تجارب هذا الأسبوع

السلام عليكم 

ماتخيلت اني ببدا اول تدوينة لي بهالشكل بس طولت ما ادري كيف ابدا وابدا بأيش واختصرتها باني ابدا بتجاربي لهذا الاسبوع  so here we go!

- اول تجربة هي تطبيق بنك الراجحي!

اكتشفت معلومة جديدة علي هالاسبوع لما كنت اشتكي اني احتاج احول لامي مبلغ وما اني قادره! لازم اروح الصرافه او ارسل احد يروح عني وما ادري ايش لكن لكن لكن *عمر حسين ستايل😂* علمتني اختي انه صار نقدر نضيف حسابات الناس من التطبيق كمستفيدين ونحول لها على طول! جربت في لحظتها وضبطت!
حولت لأمي ثلاث تحويلات مختلفه خلال ٢٤ ساعة بس -باين اني ماصدقت وبديت اسدد حساباتي 😂- جتني صدمة لما عرفت ان البنوك الثانية من زمان عندهم هالميزة في التطبيق لكن الشكوى لله.

- التجربة الثانية هي الشاشة الذكية
*تحديث* وصل الجهاز الى البريد السعودي وتم إرجاعة بسبب رفض الإعلام للجهاز أعتقد لأن فيه برامج يفتح قنوات مشفره ماكنت أعرف عنه*

عندي مشكلة ان شاشة بيتي عادية ودورت على جهاز بسيط اضيفه لها وتتحول الى شاشة ذكيه والاهم ما أتكلف ولقيت هالشيء في جهاز mi box من شركة شاومي ، الجهاز حجمه صغير وفيه تطبيقات من ضمنها اليوتيوب ونتفليكس - وهم المهمين عندي - له نسختين نسخه صينية ونسخة عالمية ، العالمية لغتها انجليزي فتأكدو اذا بتطلبون تطلبون النسخة العالمية مو الصينية لأن مافيه خيار تغيير اللغة.

طلبت الجهاز من موقع  gearbest سعر الجهاز كان ٢٥٠ ريال والشحن بياخذ ١٠ ايام عمل الى ٢٤ يوم ، لسى ماوصلني اذا وصل بكتب تجربتي معاه وهل هو ناسبني او لا.

- التجربة الثالثة هي الدفع عن طريق الباي بال

في هالاسبوع سويت لي حساب في الباي بال وماتوقعته بهالسهوله ابدا! كنت اتوقعه بيكون معقد او فيه رسوم وغيره وصار اسهل من السهل نفسه 🙊 أعجبني كثير وطلبت عن طريقة جهاز الـmi box اضمن حقي لو صار في الشحنة تلف او غيره، كان فيه متجر في نفس الموقع يبيع الجهاز بسعر ارخص بفرق ٥٠ ريال لكن ما طلبت منه لان ما يطلع له الدفع عن طريق الباي بال فقررت اشتري من المضمون احسن.

واللحين كيف الناس تختم تدويناتها 🙊 ؟ اساساً فيه ناس تكتب هالنوع من التدوينات او أنا بصير لحالي 😂 ؟
*تهرب وتقفل التدوينة*