كيف يتمكن شخص فوضوي من إدارة منزلة؟

السلام عليكم

صعب علي الإعتراف لكن انا انسانة فوضوية جداً فوضوية ! لكن أحاول اصير منظمة

قبل ما أعرف شخصيتي كنت أقارن نفسي بناس منظمة جداً واردد في داخلي كيف فيه ناس منظمة ودائماً ترتب وتشتغل وانا العكس؟ استوعبت وقتها أن شخصيتي فوضوية وبدأت أحاول أفعل أشياء كشخص فوضوي يطبقها ويلتزم فيها كل يوم هذا يعتبر إنجاز!

تغيرت طريقة عيشي في بيتي وتسهلت أمور حياتي بعد الترتيب فعلاً. بدأت ألقى وقت أطبخ وجبات ألقى وقت أروق في البيت أعطرة اجلس كذا أعيش وقت الفراغ بدون ما افكر بكومة مواعين جالسة على قلبي او ترتيب مارتبتة في الغرفة او في دولاب الملابس ، لا كل شي نظيف ومرتب وابداً مو كل وقتي يروح في الترتيب وشغل البيت وقتي أكثرة لي أنا والباقي من وقتي يروح بشكل خفيف للبيت وللعناية فيه وتنظيفه.

اكتشفت أن الناس المنظمة ما تقضي وقتها كله تنظيف وترتيب زي ماكنت متوقعة! ممكن هم مثلي الآن ناس فوضوية بس حبت ترتب وقتها وطريقة عيشها بعادات وأفعال يومية تسهل عليهم وتختصر عليهم وقت يقضونه في التنظيف بعد أوقات من التسويف وجلد الذات على هذا التسويف...

-قبل ما أبدأ- فادني جداً قراءة كتاب سحر الترتيب وترتيب بيتي والتخلص من الأغراض الزائدة فيه على اساسة ،

لما تسوون جرد للبيت بتطلع لكم كمية اغراض مهووله كلها ما تحتاجونها و بعضها حتى تالفة ومضيقة عليكم المكان *لقيت غلاية موية خربانة فعلياً ومخليتها عندي ما أعرف ليه 😂 أتوقع على أساس اذا خربت غلايتي يمكن اشبكها وتزيين يعني 😂*

بعد ماتسوون تصفية للبيت راح يترتب المكان وتقل الأغراض وبتحسون بالخفة 🙊💕 البيت بيكون دائماً مرتب حتى لو كنتو فوضويين وما يبقى عليكم الا الترتيب اليومي فقط 💪 هنا و هنا مقطعين من رنا الغامدي استفدت منهم تتكلم عن سحر الترتيب 💖

طيب نجي للأشياء الي حرصت ألتزم عليها في تنظيف البيت يومياً :

١. حرصت ارتب مفرش السرير اول ما اصحى من النوم. اسهل نقطة واهم نقطة بس ترتبين السرير الغرفة كلها بترتب حتى لو مب مرتبة 🙊

٢. أحرص على تفريغ غسالة الصحون وشبك الصحون من المواعين النظيفة. إذا فرغتها اول باول ماراح اراكم المواعين المستخدمة على المجلى او على الدولاب الى ما أتحرك وأفضي الغسالة. كوني أفضيها على طول واعبي المواعين كل ما استخدمتها احسن بمليون مره من مراكمتها في الغسالة بعد الغسيل ومراكمة المواعين المستخدمة في اي مكان على الدولاب ويصير المطبخ حفلة من الفوضى وخيبة امل كبيرة

٣. الاستعانة بعد الله بالأجهزة المنزلية وشرائها. غسالة الملابس الاتوماتيك والمجفف الحراري وغسالات الصحون صارت من الأساسيات في كل بيت ، توفر وقت وجهد وتعمل بكفاءة احسن.

* غسالة الصحون مفيييدة جداً للشخصيات الفوضوية والي مو فوضوية اشتروها كلكم 🙊💖 تغسل كل مواعيني ماعدا الترامس حتى الخلاط يدخل في الغسالة 👏وجودها مهم جداً وقلل من الوقت الي اقضية في المطبخ لأكثر من النصف! الوقت الي كنت اقضيه وانا اغسل الصحون والقدور صرت اقضيه فيه ترتيب المواعين في الغسالة وتشغيلها وكنس المطبخ وتنظيفة وغسيل الملابس وممكن حتى ترتيب الصاله!*

أتذكر كنت متردده في شراءها ووقتها اروى العمراني نزلت تدونية هنا عن غسالة الصحون وكتبت "لا تقولين كلها صحنين وكوبين وقدر باليوم ، لا أبدا ، أنا أعرف انك تقضين وقت لابأس به تغسلين مواعين بالمطبخ وباقي الوقت أقدر أتخيل شكل المطبخ إما صحون متراكمة في المجلى تتنقع أو انك من النوع اللي معتمد على صحون وكاسات البلاستك بالبيت .." حسيتها تخاطبني في كلامها 😂 وقررت اشتريها في وقتها ، كنت لسى في فترة نفاسي بطفلي وقلت اشتريها الآن احسن بما أن صار عندي مسؤولية جديدة ليش ما اتخلص من مسؤولية قديمة؟ والحمدلله أني فعلاً عزمت وشريتها.

٤. حرصت أطلع زبالة بيتي يومياً. يمكن يكون هذا الشيء من البديهيات بس بالنسبة لي لا. خاصة اول ماتزوجت ماكانت عندنا مخلفات كثير واغلب مخلفاتنا مخلفات عادية قراطيس وأوراق ومناديل لو تنترك اسبوع ماراح يتأثر المكان لانها بدون رائحة لكن الوضع تغيير بعد اول طفل 👼💨 صارت مخلفاته مزعجة ولها رائحة تبان في درج بيتي حتى لو كانت مو ظاهره لي في البيت فعلياً وهذا الشيء كريييه. ماتحملت ورحت للسوق اشتريت اكياس زبالة سوداء حجمها ٢٠ جالون ضعف حجم زبالة الغرف العادية وأصغر بكثيير من زبالة البيت الرئيسية الي كانت عندي ، القصد منها كان اني اخليها لمخلفات طفلي لوحده واطلعها يومياً لكن تغيرت الخطة وصرت اشوفها تكفي لمخلفات بيتي وطفلي فصرت اطلعها كلها في هذا الكيس كل صباح مع الدوامات وارتحت جداً الحمدلله

٥. اخصص كيس لبقايا الأكل وأطلعه يومياً مع زبالة البيت. هذا الشيء من أول وانا اسويه الحمدلله ، أحسن فصل الأكل عن مخلفات البيت. لكن صرت احرص أخصص مكان ثابت لبقايا الاكل ، هذا الشيء يفيد في انك توزعين الأشياء لمكانها اول باول *معلومة تعلمتها من كتاب سحر الترتيب: ضروري تخصص مكان لكل شيء وبتصير شخص منظم بشكل لا ارادي وتغلبك العادة في إعادة الأشياء إلى أماكنها المخصصة بدل رميها في اي مكان*. شريت معلاق اثبت فيه الاكياس وتصير مفتوحة طول الوقت عشان اعبيها فيه على طول ، شريته من جولي شيك هنا رابطها. يفضل تعليقها في الدولاب العلوي بدل السفلي اذا كان عندكم طفل ، ممكن تشكل خطر عليه يضرب فيها او تضرب عينه

٦. شريت اكياس لتصفية حوض مجلى الغسيل من جولي شيك ١٠٠ حبه بعشرين ريال تقريبا وجداً عملية ومفيدة حبيتها 💖 استخدمها واذا امتلت شلت الكيس ورميته في الزبالة بدون ما احتاج انظف الحوض او أغسله. هنا رابطها في جولي شيك و بتلقونها في علي اكسبريس اذا حابين.

في النهاية أنا سابقاً كنت أأجل كل شي خاص بشغل البيت الى ما اتحرك وأنجزها كلها مع بعض! كان الوضع مرهق ومضيعة وقت كبيرة! اطول وانا اشتغل ولما كنت مأجله الشغل كنت ما اسوي اي شي مفيد او ممتع لأن عندي شغل مؤجل فما استفدت شيء! والآن العكس الحمدلله 💖 مايضيع مني وقت ابداً والنقاط الي ذكرتها ماتاخذ خمس دقايق الى عشر دقائق شغل وكلها في وقت متفرق ما تاخذ من جهدي ووقتي ولا من تفكيري الحمدلله 💖

نشرت التدوينة لان اقل نقطة من هالنقاط الي ذكرتها فادتني وغيرت في بيتي وفي طريقة عيشي بشكل كبير يمكن هالنقاط تلهم أحد وتفيده ايضاً 💖